Пад зорным покрывам, адзін,
Юнак на скрыжаванні мар,
Мярцвяны бляск на шэры твар
Лье з неба стылы маладзік.
Дурніца плача ля акна
У змроку сцен; на азярку
Каханкаў пара ў чаўнаку
Плыве замроена, адна.
Забойца шчэрыцца з віна,
Хапае хворых смертны страх,
Ля ўкрыжаванага Хрыста
Манашка кленчыць давідна.
Калыша маці немаўля,
Глядзіць спакойна ў ноч дзіця
Вачыма шчырага жыцця…
У бардаку дрыжыць зямля.
А днём у склепе на сцяне
Рукою белаю мярцвяк
Маўчання выскалены знак
Малюе… Шэпт жывога ў сне…