Галіна Дубянецкая. Галінкаю тою

галінкаю тою
якая згарэла
галінкаю тою

насустрач хітнецца
аціхлае рэха
насустрач хітнецца

праз месяцы й сонцы
і горныя стрэхі
праз месяцы й сонцы

параніць раптоўна
як водгульле стрэлу
параніць раптоўна

прадоннай тугою
аленяга рэву
прадоннай тугою

з нябыту прарвецца
і ліне ў прарэхі
з нябыту прарвецца

праз межы й разоры
і горкія рэкі
праз межы й разоры

кранецца бязмоўна
адвечнага дрэва
кранецца бязмоўна